صباح الخير

بصوا بقه من الآخر .. أنا تعبت .. أنا الى مليش دعوة بالموضوع و عايش حياتى و عندى بطاقة و هتجوز و أخلف عيال عادى و معنديش أى مشاكل .. تعبت .. آه و الله تعبت ..

قلتوا هيتكتب مكان الديانة عندهم ( شرطة ) .. قالوا ماشى على الرغم من ان دا ظلم .. و ربنا ميرضاش بالظلم زى ما الكل عارف .. و فرحنا و انبسطنا و قلنا اخيراً الناس هتعرف تشتغل و تروح و تيجى و تتجوز و تخلف عيال و يطعموهم ..

و الناس ظأططت فى المدونات و فى كل حته مهتمة بالموضوع دا غير صحاب الشأن طبعا .. عشان ييجى محامى و يستأنف القضية و ….

بلوم بلوم بلوم بلوم .. بحس إنى بغرق ..

بصوا انا هعمل زى ما ( عمرو أديب ) بيعمل … هقولكوا التالى ..

نقعد مع بعضينا كده قعدة عرب و تقولوا انتوا ناويين تعملوا ايه .. البهائيين مش هيتكلموا خالص .. هيسكتوا لأنهم إتكلموا كتيير لغاية ما صوتهم إتنبح و إنتوا الى هتتكلموا المرادى ..

قولولنا بصراحة .. ناويين على إيه .. مش هنعترض .. نبقى عارفين بس .. عشان حرام .. الناس دى هيحصلها حاجه من الى بيتعمل فيها دا .. خليكوا واضحين و قولولنا من الآخر ناويين على إيه ..

إن كنتوا ناويين فى الآخر تدوهم حقوقهم بس هو شوية هزار من باب إدخال السعادة على قلوب المصريين و إحياء أوجه النشاط فيهم .. مفيش مشاكل هما على إستعداد ينتظروا .. و لو إنتوا ناويين على إنهم مياخدوش حقوقهم .. قولولهم بس بدل حرقة الدم الى هما عايشين فيها دى ..

يعنى ريحونى و ريحوهم و عرفونا ايه الى ناويين عليه .. أصل طالما النية مبيته خلاص نبقى على الأقل عارفين ايه الى هيحصل ..

يعنى لو مش ناويين تدوهم حقوقهم .. عرفوهم عشان بس يجهزوا نفسهم يبدأو ميتجوزوش .. ميخلفوش .. ميعملوش أى حاجه .. إستعداداً يعنى لليوم الى ناويين تحرقوهم فيه فى ميدان عام ..

بلاش .. مش هتحرقوهم .. هتعملوا فيهم ايه … هتمشوهم .. مش هيمشوا ..

صدقونى مش هيمشوا .. متحاولوش .. !

كده .. لا عاد فى شرطة ولا شرطتين ولا أى حاجه .. !

طب عشان خاطرى انا .. بلاش عشان خاطرهم .. انا مسلم و الله .. قولولى طيب فى ودانى هتعملوا ايه و مش هقولهم .. انا عايز أرتاح .. ما بالكم هما ..

مش هقولهم صدقونى .. حد يقولى بس .. عشان خااااااااااااطرى ..

و على فكرة .. شهاب .. الى عنده  11 يوم .. غلطان .. آه غلطان .. حد قاله ييجى للدنيا .. و كمان بهائى .. بيهزر شهاب على فكرة ..

عقاباً ليه بقه .. لا هيتطعم ولا ليه شهادة ميلاد … ولا هيدخل مدرسة .. و خليه كده على ما يتعلم الأدب ..

فعلا انتوا ناس بتعرف تعاقب مين و ازاى .. 11 يوم .. أخد أكتر من حقه صحيح !!

عموما انا مستنى .. بس بجد متتأخروش فى الرد عليا .. إحتمال أخلل هنا ..

 

معتز المصرى

21 نوفمبر 2008

يا مسهل يارب