You are currently browsing the monthly archive for يونيو 2009.
- إتربط فى دماغى طول عمرى و أنا صغير إن الى بيموت فى مظاهرات لازم يكون ضد الإنجليز .. و بيهتف ” يحيا سعد .. ” ..
حكوماتنا الرشيدة إن كان هنا و لا فى إيران دمرولى طفولتى البريئة ..
شكرااااااااا !
- من إمبارح مش عارف أنام .. الى حصل فى المنتخب بعد الخسارة من أمريكا فكرنى باللى بيحصلى فى الدراسة بالظبط ..
أتعب نفس التعب .. نفس التعب ..
أطلع الأول .. أبقى رائع و جبار و مفيش منى إتنين و إزاى أنا أصلا موجود على وش الكرة الأرضية بالروعة و الجلال دا ..
اشيل مادة .. يبقى أنا ضيعت أوقات كتير .. و معنديش دم و أستاهل الدبح و بلوة من بلاوى الزمن ..
و عمرى ما عرفت أقنعهم بإنى .. و الله .. أنا زى ما أنا .. لا زدت و لا قليت .. انا معتز .. !
- عمرو أديب يبتريق صراحة على عدم رجوع ” محمد أبو تريكة ” من الأوفسايد عشان يلحق الكورة بإنه ” مكانش قادر بقا ” و ضحكة مستفزة .. و يقولك عمرو متطاولش و معملش حاجة غلط
بلاش أقول كلمة أبيحة !
- شوية إنطباعات :
نقابة الأطباء : بتفكرنى بالإخوان المسلمين .
نقابة الصحفيين : بتفكرنى بالإشتراكيين القوميين الثوريين .
نقابة المحامين : بتخوفنى .
الداخلية : اللهم أحفظنا .
مستشفيات الحكومة : وقت الضهر و الشمس شديدة و دبان و أرض قذرة و قطة جربانة .
وسط البلد : قهوة هلوكوست .. زحمة .. حواجز خضرا .. محلات راقية .. بياعين جوالين .
إسكندرية : الله .. بجد ..
جرنان الجمهورية : سمير رجب .. إتحفر الإسم فى دماغى خلاص .. لا مفر .
جرنان الأخبار : كنت بعشقه و أنا صغير .
جرنان الأهرام : كان الجرنان المثالى بالنسبالى لغاية سنتين فاتوا .
جرنان الدستور : معارضة وش .
جرنان المصرى اليوم : صحافة شعبية محترمة .
جرنان الشروق : صحافة راقية محترمة .
البشر : بحبهم قوى و مقدرش أعيش من غيرهم .. و بكرههم قوى و مش طايق أعيش مع حد !
سورى يا شباب إن نبرتى فيها إحساس مختلف عن المرات الى فاتوا شوية .. بس أنا فى حالة مش لطيفة نفسياً .. و حاسس إنى ” متفعص ” قوى !!
معتز المصرى
22 يونيو 2009
- (أ) يبقى واحد صاحبى منضم لحزب معارض .. (ب) و (ج) و (د) يبقوا صحابه ..(أ) بيورى (ب) الكارنيه بتاع الحزب ..
(ب) صرخ بعلو صوته فى وسط الشارع : إنته معارضة يلا ؟؟؟ .. ((أ)) .. و (ج) و (د) جريوا بسرعة .. دا معارضة يا عم !!!!
- واحد صاحبى تانى بيقولى ان اللى يعرفه عن الليبرالية إنها زى الليبرو فى الملعب … تلعب فى أى حتة .. أممممم .. بغض النظر .. مردتش عليه .. أصلى ساعتها إكتشفت – فجأة – مين هو " رأس الحربا " !!
- الناس متضايقة قوى إننا بنسيب القطاع العام حبة حبة .. للأسف مفيش محشى ولا ملوخية اليومين دول يا شباب .. هنقضيها فول و طعمية و ربنا يسهل و نلاقيلنا قطاع عام تانى .. عشان ( نخرط ).. .. قصدى ( نخلص ) شغل الناس الغلابة !
- على – طريقة نابولى(1) - أستطيع أن أقول و بكل صدق أن لدينا فى مصر : الله فى السماء و الحزب الوطنى على الأرض .. و مع الإتنين عايزين مصالحنا !
- واحد صاحبى بيقولى " هو إنتا تعرف كل حاجه عن الليبرالية عشان تبقى ليبرالى و لا حتى تتكلم و تكتب عنها " ..
قلتله " قشطة .. إحنا مسلمين .. تعرف كل حاجه عن الإسلام عشان تبقى مسلم ولا تكتب أو تتكلم عن الإسلام ؟! "
قالى " لا .. متخلطش الأمور .. دا دور علماء الدين .. " !
إحم .. مش فاهم .. حد فاهم أنا خلطت الأمور إزاى ؟! .. مع فارق التشبيه لحسن حد يفتكر إن الليبرالية دين جديد ولا حاجه !
- شعار الحزب الوطنى اليومين دول .. " أحسن ناااااااس .. أدينا بنزور .. ورانا إيه .. ورانا إيه .. .." إحم .. بلاش أكمل أحسن !
—————————————————–
1) http://www.shorouknews.com/Columns/Column.aspx?id=46256
معتز المصرى
18 يونيو 2009
- المسلسلات التركي زى البطيخة .. مينفعش تاكل حتة واحدة بس !
- بستغرب جداً لأن كل إعلانات الصابون بيربطوها بالأنثى .. يبدو أن الرجال لم ينضجوا بعد للديمقــ .. أقصد بالنسبة للنضافة يعنى !
- عادل إمام بيرشح جمال مبارك لإنتخابات 2011 .. تصدقوا هيطلع فيلم كوميدى جدااا .. بس هل يا ترى الفيلم دا هيلحق موسم الصيف ولا .. و الله .. علمى علمك !!
- الحزب الوطنى الديموووقراااطى بيعجبنى فيه إن كل حاجه ( شريفة و جميلة و مباركه و نظيفة وعزيزة و مسرورة و عالية و أنعم الله عليها ) حاجه تفرح و الله !
- منتدى ” روايات التفاعلية ” أثبت على مدى سنوات نموذج ديمقراطى حقيقى فى الحكم .. إنتخابات حقيقية و تداول فعلى للسلطة .. أنا خايف للمنتدى يتقفل بحجة تهديد الأمن العام و محاولة قلب نظام الحكم .. آه و الله !
- الأحزاب السياسية المصرية بتفكرنى بـ ” كلماتى المفعوصة ” .. و لا ليها أى لازمة بس تضحكك للركب !
معتز المصرى
16 يونيو 2009
- فى إيران يموت الناس من أجل الديمقراطية .. عرفتوا ليه مفيش ديمقراطية عندنا.. الحكومة بتحبكم يا بشر!
- لكى تنجح فى الإنتخابات الأمريكية عليك أن تحج الى إسرائيل .. و لكى تنجح فى الإنتخابات الإيرانية عليك أن تحج الى المرشد الأعلى .. أما فى الإنتخابات المصرية , الشعب بأكمله يحج الى بيت الله و لسان حالهم " اللهم لا ملجأ اليوم الا اليك .. و لا حول و لا قوة الا بالله " ..
- يعترض الناس على العنف فى أفلام " اليومين دول " و على جرأة افلام " اليومين دول " و على إبداع أفلام " اليومين دول " … و يعترض الناس أيضاً على عته أفلام " الأيام الى فاتت " .. و تكرارية أفلام " الأيام الى فاتت " .. الهى يخرب بيت الى يزعل الناس .. أنا – شخصيا – آسف ليهم !
- اليوم آخر أيام إمتحاناتى .. قررت أن " أعر " فى شارع القومية – العربية – أحد أهم معالم مدينتنا العزيزة .. أعتقد الآن اننى عرفت ليه " مصر بتتقدم بينا " !
- واحد قالى إن مصر هتهزم البرازيل فى ماتش يوم الإثنين .. إحم .. دا على أساس إن فريق البرازيل دا هو خلاصة لاعبى مركز شباب كفر البرازيل .. مركز أمريقا .. محافظة هأو !
- عندما تصبح الحرية حكراً لك .. فسلام الله على الدنيا و على الإنسان .. على رأى عمو كاظم !
- إحنا مطبعين مع إسرائيل و لا مش مطبعين من إسرائيل .. معنتش عارف .. حاسس إننا بنلعب " صلح " مع إسرائيل .. بس إحنا اللى بننضرب على قفانا .. بس إيه .. معترض سيادتك ؟؟ صحاب و بيلعبوا مع بعض !
- لما إنتحرت السمكة العزيزة" آبريل " إكتشفت إنى لما بزود الميا فى الحوض السمكة بتحب تكتشف العالم الى برا .. إممممم .. لما جردت الموضوع عرفت ليه إحنا معندناش ديمقراطية .. جربوا يحطولنا ميا كتير .. بس الريس قالهم شيلوها .. بحب اتفرج عليهم قبل ما أنام !
- واحد إخوان قالى إن الليبراليين دول هما الى مبيحبوش يزعلوا حد .. و إن معظم حزب العمل " الإشتراكى " ليبراليين .. جمال أمه .. فعلا الأخوان هما الحل !
معتز المصرى
14 يونيو 2009
